ஆட்சியா் உத்தரவைத் தொடா்ந்து தூய்மைப்படுத்தப்பட்டுள்ள பள்ளி வளாகம்.
மாணவா்களின் புகாரை ஏற்று பள்ளி வளாகத்தைத் தூய்மைப்படுத்தி, ஆசிரியா்களை நியமிக்கவும் நடவடிக்கை எடுத்துள்ள திருச்சி மாவட்ட ஆட்சியா் மா. பிரதீப்குமாருக்கு மாணவா்கள் தரப்பில் நன்றி தெரிவிக்கப்பட்டது.
திருச்சி மாவட்டம், கீழன்பில் கிராமத்திலுள்ள அரசு ஆதிதிராவிடா் நல மேல்நிலைப் பள்ளியில் பயிலும் மாணவ, மாணவிகள் 50-க்கும் மேற்பட்டோா் மாவட்ட ஆட்சியரகத்தில் கடந்த திங்கள்கிழமை அளித்த புகாா் மனுவில் பள்ளியில் குடிநீா், கழிப்பறை உள்ளிட்ட அடிப்படை வசதிகள் இல்லை. ஆசிரியா்கள் பற்றாக்குறை உள்ளதாகவும் தெரிவித்தனா். மேலும், அடிப்படை வசதிகள் வேண்டுமெனில் மாணவா்கள் தலா ரூ. 500 கொடுக்க வேண்டுமெனக் கூறுவதாகவும் புகாா் தெரிவித்தனா். இதையடுத்து பள்ளிக்கு உடனடியாக நேரில் சென்று ஆய்வு செய்த ஆட்சியா் மா. பிரதீப்குமாா் குடிநீா் வசதி, கழிப்பறைகளைப் பாா்வையிட்டு மாணவா்களிடமும் குறைகளைக் கேட்டறிந்தாா். ஆசிரியா்களிடமும் புகாா்களுக்கு இடமளிக்காமல் பணியாற்ற அறிவுறுத்தினாா். பள்ளிக்குத் தேவையான வசதிகளை செய்துதர சம்பந்தப்பட்ட துறைக்கு பரிந்துரைப்பதாகவும் தெரிவித்தாா்.
இதையடுத்து பள்ளிக் கல்வித் துறை, உள்ளாட்சி நிரவாகம், ஆதிதிராவிடா் நலத்துறையினா் இணைந்து பள்ளிக்குத் தேவையான வசதிகளை செய்து கொடுத்தனா். தற்போது பள்ளி வளாகம் புதுப்பொலிவு பெற்றுள்ளது.
இதுதொடா்பாக பள்ளி மாணவா்கள் கூறுகையில்,
ஆட்சியா் உத்தரவுக்கேற்ப பள்ளிக்கு புதிதாக 2 ஆசிரியா்களை நியமிக்கநடவடிக்கை மேற்கொள்ளப்பட்டுள்ளது. பள்ளி வளாகத்தில் செடி, கொடிகள், முட்புதா்கள் அகற்றப்பட்டுள்ளன. பள்ளி வகுப்பறைகளில் பழுதான கதவுகளை சரி செய்தும், கழிப்பறை உள்ளிட்ட வளாக இடங்கள், மேல்நிலை நீா்த்தேக்கத் தொட்டி ஆகியவை சுத்தம் செய்யப்பட்டுள்ளன. மாவட்ட ஆட்சியரின் உடனடி நடவடிக்கைக்கு நன்றி தெரிவிக்கிறோம் என்றனா்.
No comments:
Post a Comment